Вечарам 2 чэрвеня Святы Айцец Францішак прыняў удзел ва ўрачыстай эўхарыстычнай адарацыі, якая прайшла ў базыліцы св. Пятра. Адначасова адарацыі праходзілі ва ўсіх катэдральных касцёлах на пяці кантынентах, у тым ліку ў Беларусі.

Як інфармуе Ватыканскае радыё, адарацыя ў Апостальскай Сталіцы пачалася са спеву гімна Года веры. Пасля дыякан выставіў манстранцыю з Найсвяцейшым Сакрамэнтам на алтар, былі прамоўлены малітвы і наступіў момант цішыні.

Падчас адарацыі гучалі ўрыўкі з Евангелля, псальмы і спевы, таксама вернікі мелі магчымасць асабістай малітвы ў маўчанні. Паводле жадання Святога Айца, малітва адбывалася ў дзвюх інтэнцыях: за Касцёл і людзей, які пакутуюць ад насілля і новых формаў зняволення.

На заканчэнне адарацыі Папа ўдзяліў прысутным благаслаўленне Найсвяцейшым Сакрамэнтам.

(AG)