21 лістапада, на заканчэнне агульнай аўдыенцыі, Святы Айцец Бэнэдыкт XVI звярнуўся з заклікам аб спыненні ваенных дзеянняў паміж Ізраілем і сектарам Газа. Таксама Папа выказаў падтрымку тым сілам і ініцыятывам, якія працуюць дзеля дасягнення перамір’я і пачатку перамоваў.

«Я з вялікай заклапочанасцю назіраю за нарастаючым насіллем паміж ізраільцянамі і палесцінцамі ў сектары Газа. Разам з малітоўнай памяццю аб ахвярах і тых, хто пакутуе, я адчуваю абавязак яшчэ раз сцвердзіць, што нянавісць і насілле не вырашаць праблем», — падкрэсліў Святы Айцец.

«Заклікаю таксама ўлады абедзвюх краін прыняць мужныя рашэнні на карысць міру і пакласці канец канфлікту, які мае негатыўныя наступствы для ўсяго блізкаўсходняга рэгіёну, змучанага шматлікімі сутыкненнямі і патрабуючага спакою і згоды», — сказаў Бэнэдыкт XVI, словы якога прыводзіць Ватыканскае радыё.

Таксама Пантыфік нагадаў, што сёння, ва ўспамін Ахвяравання Найсвяцейшай Панны Марыі, адзначаецца Сусветны дзень сузіральнага жыцця. «Прагну запэўніць сясцёр, пакліканых Панам да сузіральнага жыцця, у сваёй асаблівай блізкасці і блізкасці ўсёй касцёльнай супольнасці», — адзначыў Папа.

Святы Айцец пажадаў, каб кляўзуровыя кляштары заўсёды адчувалі неабходную духоўную і матэрыяльную падтрымку, і падзякаваў тым, хто поўнасцю прысвяціў сябе малітве за Касцёл і свет.

(AG)