17 чэрвеня 2011 г. папа Бэнэдыкт ХVI прыняў на аўдыенцыі біскупаў з Індыі, якія знаходзяцца ў Ватыкане з візітам «Ad limina apostolorum». Пантыфік заахвоціў іерархаў да сведчання любові і служэння, незалежна ад этнічнай ці каставай прыналежнасці.

Папа падкрэсліў неабходнасць аказання падтрымкі святарам і заахвоціў «быць уважлівымі да іх патрэбаў і імкненняў, праяўляючы клопат аб іх духоўным, інтэлектуальным і матэрыяльным дабрабыце».

«Вернікі глядзяць на вас і вашых святароў як на мадэль святасці, сяброўства і згоды, якая прамаўляе да іх сэрцаў і навучае, як трэба жыць запаведдзю любові», — прыводзіць словы Папы Беларуская рэдакцыя Ватыканскага радыё.  

Бэнэдыкт ХVI выказаў удзячнасць за ўклад у жыццё Касцёла ў Індыі, які зрабілі манаскія супольнасці, асабліва жаночыя.