3 сакавіка ў лідскай парафіі Узвышэння Святога Крыжа пройдзе адкрыты турнір па міні-футболе сярод міністрантаў, названы ў гонар св. Тарцызія.

У турніры прымуць удзел 5 каманд з парафій Ліды, Гродна, Шчучына і Ашмян. Арганізатарамі турніру з’яўляюцца навучэнцы V курса Вышэйшай духоўнай cемінарыі ў Гродне.

На пачатку турніру ў парафіі Узвышэння Святога Крыжа адбудзецца святая Імша, якую ўзначаліць дапаможны біскуп Гродзенскай дыяцэзіі Юзаф Станеўскі.

Матчы і цырымонія ўзнагароджання каманд пройдуць у спартыўным комплексе «Алімпія».

Святы Тарцызій — святы Рыма-Каталіцкага Касцёла, мучанік часоў пераследу хрысціян цэзарам, пахаваны ў катакомбах Рыма. Святы Тарцызій лічыцца апекуном міністрантаў.

Дзяніс Бразінскі, (MV)